كتبت منار محمد
السنة اللي فاتت تحديدًا فبراير 2023 ، مجموعة صحاب من الإسكندرية قرروا إنهم يعملو نشاط خيري تطوعي، في الحقيقة هو تيم مختلف تمامًا عن أي تيم خيري ودة اللي هنشوفة في مقالنا النهاردة مع أحد ممثلي تيم “سوا”.
-بداية التيم كانت فين وامتي؟
سوا اقترحت فكرتها على صحابي في شهر 2 سنة 2023
وعلى شهر 4 من نفس السنة كنا معتمدين سوا.
-اي هو السباق الرمضاني؟
سنة 2021 جاتلي فكرة وعملناها أو بدأناها الحمد لله في وقتها وهي إننا نجمع من بعض وكده ونعمل شنط ووجبات رمضان، وكان الهدف منها بجانب الخير إنها تكون حاجة بنتجمع عليها كل سنة عشان احافظ على علاقتي بصحاب الكلية ساعتها، وتكون حاجة بتجمعنا كمان بصحاب فترات قبل كده، ووقتها نفذنا حوالي 40 وجبة و20 شنطة .. بالمناسبة أول سنة ما كانتش بمسمى السباق الرمضاني،جيت السنة اللي بعدها قبل رمضان بشهر أو أقل .. كنت حابب أعلن عن بداية الحوار للسنة التانية إن شاء الله .. فعملت فيديو والبداية فيه كنت عايزها تجذب الإنتباه فقولت كده (مسلسلات رمضان السنة دي غير … حقيقي سباق رمضاني صعب ) .. عشان الناس في البداية تتوقع إني هتكلم عن المسلسلات وفي الحقيقة كنت بتكلم على سباق تاني خاص بينا .. وبعدها عملت الجروب اللي حالياً وصل عدد الناس اللي فيه ل 500 شخص تقريبا وكنت قايلهم إن ده إسم مؤقت لحد ما نلاقي اسم أفضل. ولكن الاسم مكمل معانا اهو الحمدلله لتالت سنة 🙏
-اي هو “سوا”؟
الفكرة الأساسية لسوا وإللي لم يتم اعتمادها حتى الآن
وهي إننا نعمل قناة على اليوتيوب ينزل عليها محتوى متنوع وربح القناة نعمل بيه خير
ولكن حتى الآن ما عملناش الخطوة دي وإن شاء الله تحصل قريبا.
-هل السباق الرمضاني خاص بشهر رمضان فقط ولا لا؟
الأول كان الجروب ده بنشتغل عليه حاجات تانية زي زيارات وكده بس جينا من فترة واعتمدنا السباق الرمضاني خاص برمضان بس فعلا.
-كان فيه كام شخص؟ ودلوقتي عدد المتطوعين كام؟
السباق بدأ بشلة صحاب الكلية وكام حد من صحابنا عموما ولما عملت الجروب تاني سنة اتوقع كنا في حدود ال 30 ودلوقتي الحمدلله وصلنا 500 ومش ومبسوط بوجودهم معانا.
-إية هدفكم في سوا؟
سوا كان بس حوار إن مجرد قناة تجيب فلوس نعمل بيها خير بقى أو نساعد الناس يعني بيها، ولكن حاليا أهدافنا وفكرنا كبر كتير يعني ومش هقول هدفي قد ما نقول إنه بقى حلم وهو إن سوا تكون مؤسسة أو لو في مصطلح اكبر كمان هتمنى ده يحصل ..هدفها المساعدة بمختلف انواعها .. وتكون مكان بجد بيعمل على التغيير مش مجرد سد احتياجات لأشخاص وكده .. نفسي نبقى عندنا مكان كبير خاص بينا وأي حد مننا يعرف يعلم الناس حاجة يعمل ده ونكون مستهدفين كل الفئات مش بس المحتاجين .. عشان دورنا مش بس الخير اللي بنساعد بيه ناس ماديا .. وحاسس إن لسه في أهداف كتير جدا اتمنى في يوم اتكلم عنها وهي متحققة مش وأنا لسه بتمناها.
-إية شعوركم وانتوا بتساعدوا في الخير؟
أنا على مدار وجودي هنا خلال أربع سنين اهو كنت بتعلم وبكتسب خبرات في حاجات معينة وكمان بحس بمشاعر أول مرة أحس بيها، فكرة إنك تلبي رغبة حد محتاج أو تفك كرب أو حتى تسعى لحل مشكلة حد حتى لو مش مادية .. ممكن اقول جملة حد قالهالي ( اللي بنعمله ده بيحسسني إن فعلا لينا دور )
ففعلا ده شعوري يعني ويمكن كل فترة بستشعر مشاعر جديدة مع كل مكان جديد بروحه أو دعوة من حد بسمعها سواء من الناس أو من صحابنا اللي معانا.
-إية الهدف الجاي اللي عايزين توصلوا لية؟
نتوثق
التيم عباره عن اي؟
التيم فيه نوع من العشوائية عشان ما شاء الله كبر فجأة بس اكبر واكتر لجنة مميزة فيه واللي كان لازم تتعمل هي لجنة الميديا.
-اسم التيم جالك فكرته منين(سواء سوا او السباق الرمضاني)؟
السباق شبه ما ذكرت فوق
أما سوا .. فأنا نوع من الناس اللي دايما بكون عندي لزمات في الكلام .. فكنت كل ما اجي اتكلم عن حاجة هنعملها أو كده اقول هنروح سوا أو نجيب سوا أو كده فجيت بعد اول سنة من السباق كتبت بوست وكده وكان في كلمة سوا كتير .. فحسيت إنها اسم مناسب جدا للفكرة بتاعة قناة اليوتيوب اللي فكرت فيها من سنة .. فمن هنا اعتمدت الاسم .. وكنت كل ما اكتب بوست بقى احط كلمة سوا بين أقواس عشان لما ربنا يشاء وسوا تحصل .. اقول إني كنت بلمح ليها من زمان.
